amulan ñi nütram tunte ñi kimfiel tüfachi fücha chaw.
wüne, Joan Soñan Kinchekew pingefuy ñi.
weche wentrungelu, fill püle antüküdawkiawkerkefuy.
rume wesha tremürkiy, kimürkelay ñi ñuke, ñi chaw duamürkelaeyew, yalltukurkeeyew ka domomew.
chumngen ñi küdawkiawülelfiel fill pu ülmen, pichike ngülümnierkiy plata ngillayam kulliñ.
ngillayem elfalkefuy ñi pu wenüymew.
kiñekemew alkilawkefuy kiñe tripantu.
kullingekefuy kiñe pichi waka.
femngechi ngülümürkiy fentren kulliñ.
lalu ñi chaw, elungey fentren mapu.
dew nielu mapu, dewmay ñi ruka ka kintuy kiñe domo ñi kishulenoam.
perkiy señoradomo
tüfachi domomew niefuy epu wentru, küla domoyall".
fewla melileweyngün.
lay kiñe domo.
welu wüne lantuy.
pichinmew ka kurengetuy.
fewla pey mapuchedomo.
müte tuntentulay, ka lantuy.
epu wentruyall eleleyew ñi kure.
ka kintufemfuy ka domo.
ka kiñe señora pey.
tüfachi señora kiñe pichi domopüñeñ niefuy.
fütangewmarke, ka lanturke.
tüfachi domo engu kiñe yall rume nielay, dew fücha chelu engu kam.
fey newe pepi küdawwelay, welu kom ñi pu yall füchakewey.
kiñeke ñi pu ñawe fütangey.
ka ñi fotüm kurengey.
dewma rume fücha chelu, fey kake kiñeke ñi pu yall elufiy mapu, kishuke ñi küdawal engün.
ka kiñekelfiy kulliñ.
tüfachi fücha che rume mallmangefuy.
mallmawkefuy ñi nien fentren kulliñ, fentren mapu.
chem fyestamew rume dewma ngolliyem, üyagtukefuy chem che rume ñi illkutuniefiel.
rume wedakakefwiy feyti doy nienulu.
welu kewatufengelafuy.
cheleyem rume, küme chengefuy.
dewma turpu küdawwenulu, fill antü tripakefuy ñi witranmameafiel ñi pu karukatu.
ka chipakefuy wingkulmew ñi adkintual chem rume.
pefiyem pu kamañ, utukefwiy ñi nütramkayafiel.
femngechi puwülüy ñi antü lay.
lalu, rume fücha eluwün müley yiñ lofmew.
epe kayu antü niengey ñi rüngalngenun.
wüne üngümngey ñi pu fotüm ka wariyamew mülepulu.
rume kamapu kam mülepulu engün, küdawtuyngün ñi puwal.
kom feychi antü müley pepikawün.
kom yiñ pu lof ngillayiñ pulku, iloyiñ kulliñ yiñ llowam yiñ pu witran.
akulu eluwünantü, liwentu entungey ina ruka.
ka pichinmew wencheñmangey.
dew wencheñmael, fey kishuke yiñ pu wenüy elufiyiñ ilo, pulku.
dewma rangi antü kom pu che ngolliley.
ella nagün antü awiñmangey.
rume fentren kawellutun awiñmaeyew.
kiñeke wentru nielu tralka tralkatuñpüramüy wenu küme amoam ñi am.
epe konün antü yefiyiñ eltunmew yiñ rüngalafiel.
ka pichi putuñmapufiyiñ.
fey takufiyiñ tuwemew.
fantepu re ñi foro mülewepelay.
kom ti pu che mülewma tüfachi eluwünmew amuyetuyngün ñi rukamew.
kiñeke rume ngollin welu yenietuyngün fentren ilo.
femngechi afiy yiñ eluwün.